咁大個女, 第一次請老豆去旅行, 原本想於一月出發, 所以我於12月已看旅行地點和價錢, 本想去韓國, 因為老豆想看雪, 但韓國又好似唔太arm 老豆玩, 於是老豆就建議不如去雲南, 因為佢一直都好想去麗江古城. 最終決定去雲南. 但出發日期就不能夠1月出發. 因為老豆假期同我唔同, 所以我只能夠就老豆假期, 年初一起程, 價錢真的比平日貴, 但沒辦法. 同老豆去旅行係值得既.
臨出發前, 幫老豆打點好一切, 因為老豆份人比較貪靚, 怕影相會肥, 所以帶既衫都比較薄身, 最終都係由我親自出馬幫佢執行李, 今次旅程同老豆出發都係開心, 因為老豆最就得我, 不過比較慘既係, 同老豆同房,佢既鼻寒真的很利害, 完全係可以令到人訓唔到, 如果訓著亦會令人嚇醒. 好彩我都唔太醒訓, 否則呢次旅程我一定7日都冇覺好訓.....
亦因為同老豆去. 都廢事佢咁辛苦好似我平時自由行咁,又要plan,又要自己搭車.所以決定跟團.
年初一
終於都出發了, 與老豆相約機場等, 今次係Terminal 2 check in, 第一次用terminal 2, 非常之方便. 都唔係好遠姐. 3:50pm機. 但跟團永遠都會叫你早兩個鐘.又或兩個半鐘到機場. 今次約我地既集合時間係1:15pm. 原來我地最準時, 於是領隊梁先生, 叫我地先去行下食下野. 等2:00pm至再集合.
於是同老豆去左食Burger king, 2:00pm 再返去集合. 但原來大陸有好多機都delay左, 所以到目前為止,我地係confirm左機位. 但卻未有gate number, 所以領隊都講明一定delay 硬.
我同老豆就周圍行. 簡不中就留意牌仔, 睇下登左gate number未, 仲聽到康泰旅行團有人9:00am 飛杭州, 等到而家都未有gate, 真係好驚. 點知原來有驚無險. 我地班機. 只係遲左半個鐘.
4:15pm 就起飛lu~~
6:50pm到達昆明機場.當地導遊黎接機 - 名為肥仔.講流利既廣東話, 真係太好.
第一站先醫好個肚先. 肥仔講明, 係雲南最靚既係景色. 最差既係食物. 因為水溫只有80度就會滾. 所以飯會好硬. 炒菜都很多油. 因為需要大量熱量.
我地係昆明海拔有1891. 已經比香港高左好多,去到高原地方. 所有做既一切都需要慢. 唔好令自己心跳有壓力同埋唔好令自己呼吸太急.所以慢、慢、慢!
我地既第一餐已經叫做唔錯..什菌火鍋, 我都唔明, 明知d 水都唔滾, 點解仲要火鍋, 但呢一餐都覺得幾ok 既.
真係唔食都唔知, 原來我同老豆真係幾食得辣. 食抬人都試過呢碗辣椒油都話好辣. 但我同老豆就話好味. 仲狂落狂落!. 正呀!
呢個就係我地既導遊 - 肥仔, 食緊呢支係大碌竹, 亦等如水煙. 但又未如土耳其既水煙. 因為佢入面係有煙絲的.
食飽飽後, 肥仔就話由於今日係年初一, 所以夜晚去既第一個景點封左路, 金馬碧雞坊(酒吧街) d車入唔到去. 只能夠係車上遊一圈.
街上有好多人玩煙花...
9:15pm 去到酒店. 早點休息, 導遊竟然帶錯左我地另一間酒店, 真係難為司機. 佢搬晒d 行李出黎, 導遊至知, 佢又要重新放番晒上車.
最終9:45pm到達我地既酒店昆明海航酒店, 呢間靚好多...
呢度係我地朝早食早餐既地方.
我地間房,,,幾好~
不過呢間酒店就真係服務麻麻. 我地對面房都係住我地d團友. 但點知佢用匙卡開門時,lock左門. 隔左一陣. 居然有個小朋友開門, 原來入面已經有人入住. 真係離晒譜.
好. 早點休息!聽日開始我地既旅程了!
沒有留言:
張貼留言